Saud Arabystanynyň patyşasy Salman ben Abdel Aziz Al Saud mirasdüşer şazada Muhammed ben Salman Al Saudy patyşalygyň Ministrler Kabinetiniň başlygy edip belledi. Bu barada Al Arabiya teleýaýlymyna salgylanyp, TASS habar berýär.
Onuň maglumatlaryna görä, Saud Arabystanynyň patyşasy mirasdüşer şazadany premýer-ministr edip bellemek barada perman çykardy.
Şol bir wagtyň özünde, monarhyň permanynda “patyşanyň hut özüniň gatnaşmagynda geçýän hökümet mejlisiniň onuň (patyşanyň – TASS) baştutanlygynda geçiriljekdigi” nygtalýar.
Şeýle-de, Saud Arabystanynyň patyşasynyň permany bilen ýurduň Goranmak ministri wezipesine onuň beýleki bir ogly – mirasdüşer şazadanyň kiçi dogany Haled ben Salman ben Abdel Aziz bellenildi.
Bu wezipelere bellenmezden öň, patyşanyň özi Ministrler Kabinetine ýolbaşçylyk edýärdi, mirasdüşer şazada bolsa Saud Arabystanynyň premýer-ministriniň birinji orunbasary we goranmak ministridi.
