Meta Platforms Inc. amerikan kompaniýasynyň kapitallaşdyrmasy 2019-njy ýylyň ýanwar aýyndan bäri ilkinji gezek 400 mlrd dollar bellikden aşak düşdi. Muny Dow Jones Market Data-nyň maglumatlary delillendirýär diýip, interfax.ru habar berýär.
Kompaniýanyň bazar kapitallaşdyrmasy iň ýokary – 1,078 trln dollar derejesine 2021-nji ýylyň 7-nji sentýabrynda ýetdi. Şondan bäri ol tas 65% peseldi diýip, MarketWatch belleýär.
Geçen hepde Facebook sosial ulgamynyň eýesiniň paýnamalarynyň bahasy 13,5% peselip, bäş sessiýanyň her birini minus bilen tamamlady. Netijede, bahalar 2020-nji ýylyň 16-njy martyndan bäri iň pese derejä düşdi.
Meta ABŞ-nyň iň uly kapitallaşdyrmasy bolan kompaniýalarynyň sanawynda onunjy orny eýeleýär. Geçen hepde ol dokuzynjy orny Visa Inc. kompaniýasyna berdi.
Anna günündäki söwdanyň netijesi boýunça, Meta-nyň bazar kapitallaşdyrmasy 393,2 mlrd dollara barabar, on birinji orunda ýerleşýän Exxon Mobil $388,5 mlrd, Visa bolsa $399,9 mlrd kapitallaşdyrma eýedir.
