Meta kompaniýasynyň baş ýerine ýetiriji müdiri Mark Sukerbergiň baýlygy ýylyň başyndan bäri tas iki esse - $71 mlrd azaldy diýip, Bloomberg habar berýär. Bu agentlik tarapyndan düzülýän milliarderleriň indeksinde iň uly pese gaçyşdyr diýip, incsrussia.ru belleýär.
2022-nji ýylyň birinji ýanwarynda Sukerberg reýtingde altynjy orny eýeleýärdi. 16-njy sentýabra çenli ýagdaýa görä, ol 14 orun aşak düşdi we häzir $55,9 mlrd bilen 20-nji orny eýeleýär. Bu Sukerbergiň 2014-nji ýyldan bäri iň pes görkezijisi.
2020-nji ýylda onuň baýlygy 106 mlrd dollara barabardy, 2021-nji ýylyň sentýabr aýynda bolsa iň ýokary derejä – 142 mlrd dollara ýetdi. Oktýabr aýynda Sukerberg Meta-ny hödürledi. Şondan soň onuň baýlygy azalyp başlady.
Fewral aýynda Facebook aýlyk ulanyjylarynyň sanyny artdyryp bilmedi. Bu hem kompaniýanyň paýnamalary üçin bahalaryň pese gaçmagyna getirdi, Sukerbergiň baýlygy bolsa $31 mlrd azaldy. Bu taryhda iň uly pese gaçyşlaryň biridir.
Meseleleriň ýene biri hökmünde Bloomberg-iň analitikleri Instagram-yň Reels-e bil baglamagyny belleýärler. Olar mahabatdan az girdeji getirýär.
Dünýäniň tehnologiýa liderleriniň (Facebook, Amazon, Apple, Netflix, Google) arasynda iň ýaramaz ýagdaý Netflix-de görülýär. Kompaniýanyň paýnamalary 2022-nji ýylda 60% pese gaçdy. Onuň yzyndan Meta gelýär – pese gaçyş 57%. Alphabet 29%, Amazon 26%, Apple 14% pese gaçyşy görkezdi.
