«Türkmenistan» gazetiniň elektron neşiri: «Şanhaý Hyzmatdaşlyk Guramasynyň Samarkant sammitine hormatly myhman hökmünde gatnaşmaga çagyrylan Prezident Serdar Berdimuhamedowyň Özbegistana saparynyň maksatnamasynyň birinji güni wekiliýet Baştutanlary bilen bilelikde Hormatly myhmanlar seýilgähinde nahal oturtmak hem-de «Baky şäher» medeni-etnografik toplumyna baryp görmek bilen jemlendi» diýip, habar berýär.
Nygtalyşy ýaly, sammite gatnaşýan wekiliýet Baştutanlary «Baky şäher» medeni-etnografik toplumynyň merkezi girelgesiniň öňünde ýadygärlik surata düşenlerinden soňra, onuň çäginde gurlan syýahatçylyk maksatly desgalar bilen tanyşdylar. Şeýle-de olar bu ýerde Gündogar ýurtlaryna mahsus bazara baryp görüp, özbek milli tamdyr somsasynyň taýýarlanylyşyna syn etdiler. «Baky şäheriň» çägindäki «Samarkandyň ýyldyzlary» restoranynda bolsa belent mertebeli myhmanlaryň hormatyna resmi däl agşamlyk nahary berildi.
«Baky şäher» adalgasyny, köplenç, Rim bilen baglanyşykly ulanýarlar. Ýöne ony siwilizasiýalaryň iň gadymy ojaklaryny özünde jemleýän Merkezi Aziýanyň käbir şäherleri babatda ulanmagam söz ulaltmak bolmasa gerek. Gadymy Gündogaryň merjeni, medeniýetleriňdir siwilizasiýalaryň çatrygy hasaplanýan Samarkant hem özüniň has irki döwürlerden miras galan gaýtalanmajak taryhy-medeni ýadygärlikleri, täsin arhitektura desgalary bilen «Baky şäher» diýilmäge mynasyp. Bu şäherde geçmişiň şöhratly mirasy häzirki zaman binagärlik çözgütleri bilen utgaşdyrylyp, şu günüň hakykatyna öwrülýär. «Baky şäher» medeni-etnografik toplumy bolsa bu ýerde täze açylan «Silk Road Samarkand» syýahatçylyk toplumynyň ýüregi hasaplanýar.
10 gektardan gowrak meýdany eýeleýän medeni-etnografik toplumyň çäginde hakyky binagärlik aýratynlyklary bilen tapawutlanýan desgalaryň 44-si ýerleşip, onuň darajyk köçelerinde ýurduň ähli sebitlerinden gelen senetçileriň, suratkeşlerdir amaly-haşam sungatynyň wekilleriniň döredijilik ussahanalaryna orun berilýär.
