Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Federasiýa Geňeşiniň spikeri Walentina Matwiýenkonyň çakylygy boýunça 10-njy oktýabrda Russiýa Federasiýasyna barar. Bu barada Türkmenistanyň Prezidenti Serdar Berdimuhamedow Samarkandda Russiýanyň Prezidenti Wladimir Putin bilen duşuşygynyň barşynda habar berdi diýip, RIA Nowosti ýetirýär.
«Şu ýylyň onunjy oktýabrynda Federasiýa Geňeşiniň Spikeriniň çakylygy boýunça Türkmenistanyň Milli Geňeşiniň Halk Maslahatynyň Başlygy, Hormatly Gurbanguly Berdimuhamedowyň Russiýa Federasiýasyna sapary bolar» - diýip, türkmen Lideri ŞHG-niň sammitiniň çäklerinde duşuşykda aýtdy.
Öň, habar berşimiz ýaly, Şanhaý Hyzmatdaşlyk Guramasyna agza döwletleriň Baştutanlarynyň Geňeşine hormatly myhman hökmünde gatnaşmak maksady bilen, Özbegistanyň Samarkant şäherinde bolýan Prezident Serdar Berdimuhamedow Russiýa Federasiýasynyň Prezidenti Wladimir Putin bilen ikitaraplaýyn gepleşikleri geçirdi.
