Maý aýyndan awgust aýy aralygynda Ýewropa Bileleşigi (ÝB) Gün panelleriniň kömegi bilen 99 terawatt/sagatdan köp elektrik energiýasyny öndürdi, bu bolsa geçen ýylyň degişli döwründäki görkezijiden 28% köpdür. Bu barada garaşsyz analitiki merkez Ember-iň maglumatlaryna salgylanyp, Bloomberg agentligi habar berýär. Muny gazeta.ru ýetirýär.
“2022-nji ýylyň tomsunda Ýewropa Gün energiýasyny öndürmek boýunça rekord eýesi boldy – ol maý aýyndan awgust aýy aralygynda ÝB-niň energiýa balansynyň 12%-ini emele getirdi. Bellenilen döwürde Gün panelleriniň kömegi bilen 99,4 terawatt/sagat elektrik energiýasyny öndürmek başartdy” – diýlip, materialda bellenildi.
Analitikleriň maglumatlaryna görä, gaz elektrik stansiýalaryny ulanyp, şeýle mukdarda elektrik energiýasyny öndürmek 29 mlrd ýewro düşerdi. Şol bir wagtyň özünde, ýaşyl energiýanyň önümçiliginiň ýokarlanmagy Ýewropanyň gymmat we daşky gurşaw üçin zyýanly ýangyja garaşlylygy azaltmaga çalyşýandygyny görkezýär.
Hünärmenler Gün energiýasyna maýa goýumlaryň özüni ödeýändigi, sebäbi bu energiýanyň her terawatt/sagadynyň ummasyz pul tygşytlamaga kömek edendigi bilen ylalaşýarlar. Ýeri gelende bellesek, häzirki wagtda Ýewropada gurulýan elektrik stansiýalarynyň sany köpelýär welin, indi her tomus howpsuz energiýany öndürmek boýunça rekordlar goýlup bilner.
