Canalys kompaniýasy şu ýylyň ikinji çärýeginde Günbatar Ýewropada şahsy kompýuterler bazaryny öwrenmek bilen çykaran netijelerini ýaýratdy. Pudak Hytaýdaky pandemiýa bilen bagly çäklendirmeler, şeýle-de geosyýasy ýagdaýlar we ýokary inflýasiýa sebäpli ep-esli pese gaçyşy görkezdi. Bu barada 3dnews.ru habar berýär.
Aprel aýyndan iýun aýy aralygynda bu sebitde 12,3 mln stolüsti şahsy kompýuter, iş stansiýasy we noutbuk satyldy. Bu geçen ýylyň degişli döwründäki görkezijiden 18,5% azdyr.
Hytaýyň Lenovo kompaniýasy 30,9% paý bilen lider boldy. Ikinji orunda 24,7% bilen HP ýerleşýär, üçlügi 13,8% bilen Dell jemleýär. Ilkinji bäşlige 8,2% we 6,4% bilen Acer we Apple hem girdi. Bu kompaniýalaryň ählisinde satuwyň ýyllyk hasabynda pese gaçyşy hasaba alyndy.
Eger diňe noutbuk segmentini alsak, ýük iberiş dörtden bir (26%) azalyp, 9,5 mln birlik derejesinde boldy. Desktop segmentinde bolsa, tersine, 22% ösüş hasaba alyndy – 2,7 mln birlik.
Ikinji çärýegiň jemi boýunça, Günbatar Ýewropanyň bazarynda planşet satuwy 5,9 mln birlik boldy. Bu 2021-nji ýylyň ikinji çärýegi bilen deňeşdirilende, 24,3% azdyr. Liderleriň üçlügine Apple (37,7%), Samsung (21,8%) we Lenovo (16,7%) girýär.
