“Mançester Ýunaýted” futbol klubunyň paýnamalary milliarder Ilon Mask Twitterde iňlis klubuny satyn aljakdygy barada ýazandan soň çarşenbe güni söwdanyň dowamynda 17% ýokarlandy. Ýöne soň Mask degşendigini boýun aldy diýip, CNBC teleýaýlymy habar berdi. Muny forbes.kz ýetirýär.
Soňrak kagyzlar ösüşi ýitirdi we Aşgabat wagty bilen sagat 17:50-ä çenli ýagdaýa görä, klubuň bir paýnamasynyň bahasy 5,63% ösüşde 13,5 dollara barabardy. 16-njy awgustda söwdanyň ýapylyşynda “Mançester Ýunaýtediň” paýnamasy 12,78 dollara durýardy.
“Mançester Ýunaýtedi” satyn almak Maska kompaniýanyň fond bazaryndaky kapitallaşdyrmasyndan ugur alanyňda, 2 mlrd dollara düşerdi. “Mançester Ýunaýted” bu sorag boýunça teleýaýlyma teswir bermekden saklandy.
Ýatlap geçsek, çarşenbe gününe geçilýän gije Mask Twitterde “Mançester Ýunaýtedi” satyn alýandygy barada ýazdy. Abunaçylaryň soraglaryna beren jogabynda ol bildirişine çynlakaý garamaly däldigini aýtdy. “Bu Twitterde köne degişme. Men hiç hili sport toparyny satyn almaýaryn” – diýip, ol ýazdy.
Şol bir wagtyň özünde Mask eger futbol klubuny satyn alsa, onuň “Mançester Ýunaýted” boljakdygyny aýtdy. “Ol çagalykda meniň iň gowy görýän toparymdy” – diýip, milliarder belledi.
Maskyň “Mançester Ýunaýtedi” satyn almakçydygy baradaky twiti 696 müňden gowrak laýk alyp, tas 107 müň gezek paýlaşyldy. Janköýerleriň käbiri bolsa Masky Angliýanyň Premýer-ligasynyň çempionatynyň başynda iki oýunda iki gezek uly ýeňlişe sezewar bolan we turnir jedwelinde iň soňky setirde ýerleşýän kluby satyn almagy oýlanyp görmäge çagyrdy.
