SpaceX we Tesla kompaniýalaryny esaslandyryjy Ilon Mask Neuralink implantasiýa edilýän neýrointerfeýsleriniň kömegi bilen adamlary çipleşdirmegi näme üçin zerur hasaplaýandygyny düşündirdi. HHR-iň Kibergiňişlik meseleleri boýunça edarasy tarapyndan neşir edilýän “China Cyberspace” žurnaly üçin makalasynda ol beýnä implantlary oturtmagyň oňyn taraplaryny sanady. Bu barada rbc.ru habar berýär.
Telekeçi çipleşdirme adamzada emeli intellekt bilen netijeli birleşmäge mümkinçilik berip, beýniniň işjeňligini höweslendirer diýip hasaplaýar. Milliarder implantasiýanyň mümkinçiligi çäkli adamlara hem kömek etjekdigini belleýär. “Bu oňurga şikesleri we psihika ulgamynyň bozulmalary bolan adamlarda el-aýaklaryň hereket ediş funksiýasyny dikeldip ýa-da ysmaz adamlara kompýuter ýa-da ykjam telefonlar bilen işlemek üçin öz beýnisini netijeli ulanmaga mümkinçilik berip biler” – diýip, işewür belledi.
Maskyň pikiriçe, çipleşdirme geljekde işjeň ösdürilip, onuň başlangyjy bu prosesi ýaýradar we çaltlaşdyrar. “Neuralink kompýuter bilen adam beýnisini birleşdirmegiň tehnologiýasyny, smartfonlar ýaly dakylýan gurluşlara meňzeş teňňe ululygyndaky beýni çiplerini işläp düzmäge uly üns berýär” – diýip, Mask aýtdy.
2020-nji ýylyň awgust aýynda Mask Neuralink startapynyň tanyşdyrylyşyny geçirdi we kompaniýanyň esasy önümi bolan neýroçibiň täze görnüşini hödürledi. Işläp düzüjileriň meýilleşdirişi ýaly, gurluş beýni bilen kompýuteriň arasynda birleşdiriji halka hökmünde işläp biler. 2021-nji ýylyň aprel aýynda çip Peýjer makakasynyň beýnisine oturdyldy, netijede ol girizilen neýron sapaklarynyň kömegi bilen hereketlerine gözegçilik edip, wideo oýunlaryny oýnap bildi.
