Synçylar Ýewropa üçin awgustdaky gurakçylygyň täsiriniň, iýuldaka garanyňda, has agyr boljakdygyny çaklaýarlar. Bu barada alymlaryň Ýewropa Komissiýasynyň sargydy bilen taýýarlan hasabatynda aýdylýar. Ony euronews.com ýetirýär.
Hasabatda aýdylyşy ýaly, ol ýa-da beýleki ýagdaýlarda gurakçylyk tutuş yklymy diýen ýaly gurşap alar. Ýöne Fransiýanyň günortasynda, Ispaniýanyň we Portugaliýanyň belli bir çäklerinde has howply ýagdaý emele geldi. Ýewropanyň ähli derýalarynda suwuň derejesi hem adatdan daşary ýagdaýda pes bolmagynda galýar.
Şu tomsuň dowamynda Fransiýany gyzgynlygyň eýýäm dördünji tolkuny gaplap aldy. Ýurduň Hökümeti howanyň ýokary temperaturasy we ýagynyň ýeterlik däldigi sebäpli, ýurtda meteorologik barlaglaryň taryhynda iň güýçli gurakçylygyň hasaba alynýandygyny belleýär. Oba hojalyk ekinleri, şol sanda lawanda hem-de günebakar gyzgynlykdan has köp ejir çekýär.
Şu günlerde Britan adalarynda hem adatdan daşary gyzgyn howanyň bolmagyna garaşylýar. Günorta we Merkezi Angliýada howanyň derejesi kölegede +35 gradusdan geçer. Şoňa görä-de, ýurtda agyz suwuny tygşytlamak üçin baglary we ekinleri şlanga arkaly suwarmaga wagtlaýyn gadagançylyk girizildi.
