Iýun aýynda ýarym geçirijileriň global satuwy 13,3% - geçen ýylyň degişli aýyndaky 44,85 mlrd dollar bilen deňeşdirilende, 50,82 mlrd dollara çenli ýokarlandy. Bu barada Ýarym geçiriji senagat assosiasiýasynyň (Semiconductor Industry Association, SIA) metbugat relizinde habar berilýär diýip, interfax.ru belleýär.
Şol bir wagtyň özünde ol maý aýy bilen deňeşdirilende 1,9% azaldy.
Ikinji çärýegiň jemi boýunça satuw 152,5 mlrd dollar boldy, bu bolsa geçen ýylyň degişli döwründäki görkezijiden 14,2% ýokarydyr we şu ýylyň ýanwar – mart aýlaryndaky mukdardan 0,5% köpdür.
“2022-nji ýylyň ikinji çärýeginde ýarym geçirijileriň global satuwy gowy bolmak bilen, geçen ýylyň ikinji çärýegi bilen deňeşdirilende ähli esasy önüm kategoriýalary boýunça we ähli esasy sebit bazarlarynda ýokarlandy, – diýip, SIA-nyň prezidenti we baş ýerine ýetiriji müdiri Jon Nýufer belleýär. – Şeýle-de bolsa, soňky aýlarda bazaryň ösüşi birneme haýallady”.
Iýun aýynda ýyllyk aňlatmasynda ösüş depgini 2021-nji ýylyň fewral aýyndan bäri ilkinji gezek 15%-den aşak düşdi diýip, ol belledi.
Iýun aýynda Demirgazyk we Günorta Amerikada mikroprosessorlaryň satuwy geçen ýylyň şol aýy bilen deňeşdirilende 29%, Ýewropada 12,4%, Ýaponiýada 16,1%, Hytaýda 4,7%, Aziýa-Ýuwaş umman we beýleki sebitlerde 11,9% ýokarlandy.
Maý aýyna garanyňda çip satuwy Demirgazyk we Günorta Amerikada 0,9%, Ýewropada 1,1%, Ýaponiýada 0,7%, HHR-de 2,8%, Aziýa-Ýuwaş umman we beýleki sebitlerde 2,3% azaldy.
