Türkmenbaşydaky nebiti gaýtadan işleýän zawodlar toplumynda öndürilen, EURO-5, EURO-6 ýaly ýokary ekologik talaplara doly laýyk gelýän A-98 kysymly awtoulag benzininiň ilkinji möçberleri dünýä bazarlarynda ýerlenildi.
Hökümetiň 29-njy iýulda geçirilen giňişleýin mejlisindäki wise-premýer Ş.Abdrahmanowyň hasabatyndan mälim bolşy ýaly, Türkmenistanyň Döwlet haryt-çig mal biržasynda geleşikler geçirilip, şonuň esasynda nebit önümleri BAE-niň we Owganystanyň kompaniýalary tarapyndan satyn alyndy.
Prezident Serdar Berdimuhamedow ýokary hilli, ekologik taýdan arassa, dünýä bazarlarynda bäsdeşlige ukyply önümleriň uly islegden peýdalanýandygyny nygtap, wise-premýere öňdebaryjy tehnologiýalary işjeň ornaşdyrmak, baý tejribä hem-de uly mümkinçiliklere eýe bolan esasy daşary ýurt kompaniýalary bilen hyzmatdaşlygy pugtalandyrmak boýunça anyk tabşyryklary berdi.
