Awgust aýynda Türkmenistanyň günbatar sebitinde, şol sanda «Awaza» milli syýahatçylyk zolagynda iri çärelerdir dabaralaryň birnäçesi geçiriler. Olara görülýän taýýarlyk işleri barada 29-njy iýulda sanly ulgam arkaly geçirilen Hökümetiň giňişleýin mejlisinde degişli ýolbaşçylaryň hasabatlarynda aýdyldy.
Hususan-da,
- 1-nji awgustda Awazada dynç alýanlar üçin gurlan «Rowaç» kottejler toplumynyň açylyş dabarasy;
- 3-nji awgustda Russiýa Federasiýasynda awtomobil sportunyň ralli-reýd görnüşi boýunça geçirilen «Ýüpek Ýoly — 2022» atly halkara ýaryşda, Özbegistanyň Daşkent şäherinde ýetginjekleriň we ýaşlaryň arasynda agyr atletika boýunça geçirilen Aziýa çempionatynda baýrakly orunlary eýelän türgenlerimizi sylaglamak dabarasy;
- 5-nji awgustda Balkan welaýatynyň Esenguly etrabynda gurlan «Arkadagyň nesilleri» atly döwrebap çagalar dynç alyş merkeziniň açylyş dabarasy;
- 8-nji awgustda Balkan welaýatyndaky Garabogazköl aýlagynyň üstünden guruljak täze köpriniň düýbüni tutmak dabarasy;
- 12-nji awgustda «Awaza» milli syýahatçylyk zolagynda Hazar deňziniň güni mynasybetli maslahat;
- 15-16-njy awgustda bolsa deňze çykalgasy bolmadyk ösüp barýan döwletleriň ulag ministrleriniň halkara maslahaty ýaly dürli görnüşli çäreleri geçirmek göz öňünde tutulýar.
Prezident Serdar Berdimuhamedow şular barada aýdyp, 1-nji awgustdan ähli ýolbaşçylaryň zähmet rugsadyna çykýandygyna garamazdan, meýilleşdirilen ähli çäreleri ýokary guramaçylyk derejesinde geçirmegiň möhümdigini aýratyn nygtady.
