Ýük awtomobillerini öndürmek boýunça dünýäde ikinji orunda durýan Şwesiýanyň Volvo AB konserni ikinji çärýekde girdejisini, şeýle-de arassa we operasion girdejisini ýokarlandyrdy. Bu barada interfax.ru belleýär.
Kompaniýanyň metbugat relizinde habar berlişi ýaly, aprel – iýun aýlarynda arassa girdeji geçen ýylyň degişli döwründäki 9,06 mlrd Şwesiýa kronasy bilen deňeşdirilende, 10,52 mlrd krona ($1,03 mlrd) boldy.
Düzedilen operasion girdeji 9,73 mlrd kronadan 13,75 mlrd krona çenli ýokarlandy. Bloomberg agentligi tarapyndan sorag edilen analitikler bu görkezijiniň 12,5 mlrd krona ýetmegine garaşypdylar.
Düzedilen operasion tapawut bir ýyl ozalky 10,7% bilen deňeşdirilende, 11,6%-e çenli ýokarlandy. Volvo-nyň çärýek girdejisi 31% ýokarlanyp, 118,9 mlrd krona boldy.
Şol bir wagtyň özünde, geçen çärýek ýük ulaglary üçin sargytlaryň göwrümi 57,96 müňden 53,39 müňe çenli azaldy, üpjünçilik bolsa 45,67 müňden 60,83 müňe çenli ýokarlandy. Gurluşyk enjamlarynyň sargytlary 36,12 müň birlikden 21,09 müňe çenli peseldi, üpjünçilik bolsa 30,66 müň birlikden 22,4 müňe çenli azaldy.
Sişenbe güni Volvo-nyň paýnamalary 2% gymmatlady. Şu ýylyň başyndan bäri kompaniýanyň kapitallaşdyrmasy 18,1%, 340 mlrd krona çenli azaldy.
