33 ýaşly öňki russiýaly söweşiji we ýeňil agramda UFC-niň eks-çempiony Habib Nurmagomedow çempionda bolmaly esasy häsiýet barada gürrüň berdi. Bu barada championat.com habar berýär.
“Söweşijiler bilen çempionlaryň arasyndaky tapawut çempionlaryň basyşdan baş çykaryp bilmeginde jemlenýär. Söweşiji kän, ýöne olaryň ählisi çempion bolup bilmeýär. Sen diňe ähli basyşlary dolandyrmagy öwrenen ýagdaýyňda çempion bolup bilersiň. Sen şol basyşy kabul edýärsiň we ony dogry ugra gönükdirýärsiň. Sen ony ulanyp bilýärsiň. Adaty söweşiji bilen çempionyň arasyndaky tapawut hem şundadyr.
Men mundan nähili baş çykarmalydygyny, muny nähili dolandyrmalydygyny bilýärdim we bu basyşy üstünligim üçin peýdalandym. Oktagona çykýan köp söweşijiler millionlarça adam olara sereden ýagdaýynda we basyş edilende özlerini dolandyryp bilmeýärler. Ýöne sen muny diňe bir dolandyrman, eýsem öz garşydaşyňa tarap ulanyp biljekdigiňi duýan wagtyňda, sen ýeňýärsiň” – diýip, Habib Braýan Robertsiň YouTube-kanalynda aýtdy.
Nurmagomedow MMA-da 29 söweş geçirip, olaryň her birinde ýeňiş gazandy. Soňky gezek ol 2020-nji ýylyň güýzünde söweşip, amerikaly Jastin Getjiden üstün çykdy. Söweşden soň ol professional karýerasyny tamamlaýandygyny, sebäbi ejesine kakasyz söweşmejekdigine wada berendigini aýtdy.
Karýerasyny tamamlandan soň, Nurmagomedow Eagle FC promouşenini esaslandyrdy. EFC ilkinji çäresini 2022-nji ýylyň 28-nji ýanwarynda ABŞ-da geçirdi. Häzirki wagtda Habibiň ligasy 46 ýaryş geçirdi.
