Apple kompaniýasynyň iPhone 13 we Samsung kompaniýasynyň Galaxy A12 smartfonlary 2022-nji ýylyň birinji çärýeginde dünýäde iň köp satylýan smartfonlar boldy. Şeýle maglumatlary IDC kompaniýasynyň analitikleri berýär diýip, gazeta.ru belleýär.
Bellenilişi ýaly, iPhone 13 smartfon alyjylaryň arasynda meşhurlygy boýunça birinji orny eýeledi. Ikinji orny bolsa Apple-den flagmanyň iň gymmat wersiýasy – iPhone 13 Pro Max aldy. Iň köp satylýan smartfonlaryň üçlügini Samsung-yň başlangyç derejeli smartfony Galaxy A12 jemledi.
Meşhurlygy boýunça indiki smartfonlar iPhone 13 Pro we orta derejeli Galaxy A32 boldy. IDC kompaniýasynda satylan gurluşlaryň umumy sany hem-de telefonlaryň her biriniň bazar paýy mälim edilmedi. Hünärmenler iPhone 13 mini smartfonyna bildirilýän islegiň beýleki modeller bilen deňeşdirilende azdygyny bellediler. Ol bäşlige-de girmedi. Bu hem Apple kompaniýasynyň iPhone mini-den ýüz öwürmekçidigi baradaky gürrüňleri ýene bir gezek düşündirýär.
Umuman alanyňda, iPhone 13 maşgalasy iPhone-iň 2022-nji ýylyň ilkinji üç aýyndaky umumy girdejisiniň 84%-ini emele getirýär. Girdejiniň galan bölegi iPhone SE (2022) we iPhone 12 hem-de iPhone 11 modelleriniň paýyna düşýär. Analitikler iPhone 14 hasam üstünlikli bolar diýip hasaplaýarlar.
