16-njy aprelde Türkmenistanyň Milli Geňeşiniň Halk Maslahatynyň nobatdaky mejlisi geçiriler. Oňa görülýän taýýarlyk işleri barada 14-nji aprelde geçirilen Hökümetiň göçme mejlisinde Halk Maslahatynyň Başlygynyň orunbasary K.Babaýew maglumat berdi.
Bellenilişi ýaly, 16-njy aprelde geçiriljek Halk Maslahatynyň nobatdaky mejlisiniň gün tertibine Milli Geňeşiň Mejlisi tarapyndan kabul edilen kanunlary ara alyp maslahatlaşmak meselesi giriziler. Prezident Serdar Berdimuhamedow täze döwrüň talaplaryny, milli kanun çykaryjylyk ulgamyny we halkara hukuk tejribesini nazara almak bilen, kabul edilýän kanunçylyk namalarynyň üstünde içgin işlemegiň wajypdygyny nygtady.
Şeýle-de Halk Maslahatynyň agzalary, Mejlisiň deputatlary ministrlikler we pudaklaýyn dolandyryş edaralary bilen bilelikde, kanunçylygy hem-de hukuk tertibini pugtalandyrmaga, ilaty durmuş taýdan goramaga, maşgalalary goldamaga, zähmet gatnaşyklaryny kämilleşdirmäge gönükdirilen kanunlaryň taslamalarynyň üstünde işleýärler.
