Häzirki 2021-2022-nji maliýe ýylynda (31-nji martda tamamlanýar) Hindistanyň smartfon eksporty öňki ýyl bilen deňeşdirilende 85% ýokarlanar we 5,6 mlrd dollardan geçer. Bu barada Hindistanyň Öýjükli aragatnaşyk serişdelerini we elektron harytlaryny öndürijileriň assosiasiýasy (ICEA) habar berdi. Muny TASS ýetirýär.
“COVID-19 pandemiýasy sebäpli lokdaunlaryň, işçi güýjüniň azalmagynyň we daşary ýurtlardan toplumy düzüjileriň, şol sanda mikroshemalaryň we ýarym geçirijileriň üpjünçilik zynjyryndaky düýpli çökgünligiň fonunda eksportyň ösüşi gazanylar” – diýip, “Business Standard” gazeti Assosiasiýanyň ýolbaşçysy Pankaj Mahindrunyň sözlerini getirýär.
Öň Hindistan özüniň smartfon eksportyny Günorta Aziýanyň, Afrikanyň, Ýakyn Gündogaryň we Gündogar Ýewropanyň ýurtlaryna gönükdirdi. Häzirki wagtda bu önümleriň üpjünçiligi üçin günbatar ýurtlarynyň we Aziýanyň uly döwletleriniň bazarlary ileri tutulýar diýip, Mahindru aýtdy.
“Smartfon eksportynyň ösüşi Hindistanyň daşary ýurtlara çig mal harytlaryny satmakdan ösen senagat pudaklary tarapyndan öndürilen ýokary tehnologik önümleriň üpjünçiligine kem-kemden geçýändigini görkezýär” – diýip, ol belledi.
Hindistan smartfon çykarmak boýunça önümçilik bazasyny ýokarlandyrmak üçin Samsung, Foxconn we Pegatron ýaly kompaniýalar bilen hyzmatdaşlygy işjeň ösdürýär.
