Ýekşenbe güni Nýu-Deli COVID-19 pandemiýasy sebäpli iki ýyl mundan öň arasy üzülen yzygiderli halkara howa gatnawlaryny dikeldenden soň, hindi we daşary ýurt awiakompaniýalaryna Hindistana we ondan uçmak üçin hepdede 3,2 müň töwerek halkara awiagatnawlary amala aşyrmaga rugsat berildi.
Bu barada Hindistanyň Raýat awiasiýasynyň baş müdirliginden alnan maglumata salgylanýan Press Trust of India habarlar agentligi habar berýär diýip, TASS-a salgylanýan Trend ýazýar.
Şol maglumatlara görä, alty sany hindi awiaýükdaşaýjylary üçin hepdede umumylykda 1 466 halkara gatnawy makullandy. Müdirligiň maglumatlaryna görä, olar 43 ugur boýunça 27 ýurda uçuşlary amala aşyryp bilerler. Mundan hem başga, 40 ýurduň 60 töweregi daşary ýurt awiakompaniýasy uçuşlaryň tomusky möwsüminde hepdede Hindistana we yzyna 1 783 uçuşy amala aşyrmaga ygtyýar aldylar. Uçuşlaryň tomusky rejesi 27 martdan 29 oktýabra çenli hereket edýär.
The Times of India gazetiniň ýekşenbe sanynda bellenişi ýaly, gatnawlaryň sany kem-kemden artdyrylar we şoňa görä biletleriň bahasy hem arzanlar.
