Hytaýyň Huawei kompaniýasy 2021-nji ýylda arassa girdejiniň rekord derejesini gazanmagy başardy – 113,7 mlrd ýuan (takmynan, $17,8 mlrd), bu bolsa 2020-nji ýyl bilen deňeşdirilende, 75,9% köpdür. Bu barada kompaniýanyň maliýe müdiri Men Wançžou metbugat konferensiýasynda aýtdy diýip, TASS habar berýär.
Geçen ýyl kompaniýanyň umumy girdejisi ýyllyk aňlatmasynda 28,6% azalyp, 636,8 mlrd ýuan (takmynan, $100,1 mlrd) boldy. Şol bir wagtyň özünde 2021-nji ýylda Huawei hususy ylmy-tehniki işlere maýa goýumyny ep-esli artdyrdy, ol 142,7 mlrd ýuan (takmynan, $22,4 mlrd) bolup, kompaniýanyň umumy girdejisiniň 22,4%-ine deň boldy. Şeýlelik bilen, soňky hasabata görä, 2012-nji ýyldan bäri kompaniýanyň ylma we täze işlere maýa goýumy 845,6 mlrd ýuan ($132,9 mlrd) boldy.
2019-njy ýyldan bäri Huawei ABŞ tarapyndan girizilen sanksiýalar sebäpli basyşlara sezewar bolýar. Aýratynam, kompaniýanyň smartfon önümçiligi we satuwy bilen baglanyşykly biznesi zyýan çekdi, bu hem täze çipleriň üpjünçiliginiň bes edilmegi we amerikan tehnologiýalaryna elýeterliligiň petiklenmegi bilen baglanyşyklydyr.
2020-nji ýylda Huawei-niň arassa girdejisi 2019-njy ýyldaky görkezijiden 3,2% ýokary bolup, 64,6 mlrd ýuana (takmynan, $10,1 mlrd) ýetdi. Umumy satuw girdejisi ýyllyk aňlatmasynda 3,8% ýokarlanyp, 891,4 mlrd ýuan (takmynan, $139,4 mlrd) boldy.
