Russiýa sekiz ýurda, şol sanda Türkmenistana uçuşlar babatynda COVID-19 bilen bagly girizilen çäklendirmeleri ýatyrdy. Bu barada Rosawiasiýanyň metbugat gullugyna salgylanýan TASS anna güni habar berdi.
"2022-nji ýylyň 9-njy martynda Russiýa Federasiýasynyň hökümetiniň karary bilen, COVID-19-yň ýaýramagynyň öňüni almagyň çäklerinde, Azerbaýjana, Ermenistana, Gazagystana, Gyrgyzystana, Täjigistana, Türkmenistana, Özbegistana we Eýrana amala aşyrylýan yzygiderli we ýörite uçuşlara girizilen çäklendirmeler aýryldy" - diýip, Russiýa Federasiýasynyň howa ulaglarynyň Federal agentligi mälim etdi.
Şeýle hem, owal Belorussiýa, Dominikana, Müsüre (Kairden başgasyna), BAE-ne, Türkiýä, Finlýandiýa, Çehiýa, Şweýsariýa, Günorta Koreýa we Kuba uçuşlara girizilen kowid çäklendirmeleri hem doly aradan aýrylypdy - diýip TASS belleýär.
Indi bu ýurtlara uçuşlar diňe howa gatnawlary hakyndaky hökümetara ylalaşyklaryň düzgünleri we ýurtlaryň awia ýolbaşçylarynyň käbir ylalaşyklary bilen çäklenýändir.
Awiakompaniýalar yzygiderli we ýörite uçuşlary amala aşyranlarynda Russiýa Federasiýasynyň Baş döwlet sanitar lukmanynyň "COVID-19-yň ýaýramagynyň öňüni almak maksady bilen, aýry saklamak düzgünini üpjün etmek hakyndaky" kararynyň düzgünlerini berjaý etmek möhümdir - diýip, Rosawiasiýada habaryň üstüni ýetirdiler.
