Alphabet korporasiýasyna degişli bolan Google kompaniýasy aprel aýyndan başlap işgärlerini ofise getirmek kararyna geldi. Bu barada kompaniýanyň işgärlerine iberilen hata salgylanyp, Bloomberg agentligi habar berdi. Muny TASS ýetirýär.
Agentligiň bellemegine görä, Google San-Fransisko aýlagynyň töweregindäki işgärlerden aprel aýyndan başlap hepdede üç gün ofise işe çykmagyny soraýar. Bloomberg-iň maglumatlaryna görä, kompaniýa koronawirus bilen keselleme hadysasynyň sany azalandan soň şeýle karara geldi.
“Biz mart aýynyň dowamynda adamlara täze režime geçmäge kömek etmegi meýilleşdirýäris we 4-nji aprele çenli işiň gibrid režimine doly geçmegi maksat edinýäris” – diýlip, hatda aýdylýar.
2021-nji ýylyň dekabrynda Google ABŞ-da koronawirusyň omikron ştammynyň ýaýramagy sebäpli ýurtdaky ofislerine işgärleriň gaýdyp barmaly möhletini yza süýşürdi.
