Häzirki wagtda Türkmenistanda 2022-nji ýylyň 12-nji martynda geçiriljek Türkmenistanyň Prezidentiniň saýlawlary üçin dalaşgärleri hödürlemek işleri dowam edýär. Şonuň netijesinde, Türkmenistanyň Prezidentiniň saýlawlary boýunça dalaşgär hödürleýän raýatlaryň teklipçi toparlary tarapyndan ýene-de 2 dalaşgär hödürlenildi. Bu barada «Watan» habarlar gepleşiginiň 18-nji fewraldaky gijeki goýberilişinde habar berildi.
Habar berlişi ýaly, raýatlaryň teklipçi toparlary tarapyndan Lebap welaýatynyň Maliýe-ykdysady orta hünär okuw mekdebiniň direktory Perhat Begenjow hem-de Türkmenistanyň Saglygy goraýyş we derman senagaty ministrliginiň “Awaza” şypahanasynyň baş lukmany, Türkmenistanyň Milli Geňeşiniň Mejlisiniň deputaty Berdimämmet Gurbanow Türkmenistanyň Prezidenti wezipesine dalaşgär hökmünde hödürlenildi.
Ýeri gelende bellesek, Türkmenistanyň Demokratik partiýasy tarapyndan Türkmenistanyň Ministrler Kabinetiniň Başlygynyň orunbasary Serdar Berdimuhamedowyň we Agrar partiýa tarapyndan Mary welaýatynyň häkiminiň orunbasary Agajan Bekmyradowyň dalaşgärligi bellige alyndy hem-de olara degişli şahsyýetnamalar gowşuryldy.
