Serbiýanyň prezidenti Aleksandr Wuçiç golliwud aktýory Jonni Deppe altyn medal gowşurdy. Bu baýrak jemgyýetçilik we medeni işlerde, hususan-da kino sungatynda we respublikany dünýä arenasynda tanatmakda bitiren hyzmatlary üçin berildi diýlip, Balkan Insight habar berýär.
Aktýor Serbiýa bilen baglanyşykly birnäçe kino taslamalaryna gatnaşdy, olaryň arasynda “Beýik” filmi üçin Belgradda surata düşürilen sahnalar, şeýle-de “Tupikler” serb multserialy bar.
Jonni Deppiň Serbiýanyň öňünde bitiren hyzmatlary üçin altyn medal bilen sylaglanjakdygy 12-nji fewralda belli boldy. Belgrada eden saparynyň çäginde aktýory prezident Aleksandr Wuçiç kabul etdi. Depp döwlet baştutanyna tupik guşy görnüşinde ýumşak oýunjak sowgat etdi.
Jonni Deppiň kinoda indiki keşbi režissýor Maýwenn le Beskonyň täze filminde fransuz patyşasy Lýudowik XV-iň keşbi bolar. Film 2022-nji ýylyň tomsunda surata düşürilip başlanar. Ol Parižiň dürli ýerlerinde, esasanam Wersal köşgünde surata düşüriler. Filmiň ady we sýužeti heniz gizlin saklanýar.
