UEFA Çempionlar ligasynyň 1/8 final tapgyrynyň birinji duşuşygynda «Pari Sen-Žermen» fransuz kluby öz meýdançasynda 1:0 hasap bilen «Realdan» üstün çykdy.
Parižliler oýnuň tutuş dowamynda diýen ýaly artykmaçlykdan peýdalansalar-da, hasaby oýnuň goşmaça wagtynyň soňky dördünji minudynda açdylar. Madrid klubynyň derwezesine ýeke-täk goly Kilian Mbappe geçirdi. Mbappe ikinji ýarymyň başynda kluby üçin 11 metrlik jerime hem gazanyp berdi, emma Tibo Kurtua Messiniň urgusynyň hötdesinden gelmegi başardy.
Ugurdaş duşuşykda Angliýanyň «Mançester Siti» kluby Lissabonda ýeňillik bilen «Sportingden» üstün çykdy. Iňlis klubynyň futbolçylary duşuşygyň eýýäm birinji ýarymynda bäş sany jogapsyz goluň dördüsini geçirdiler.
Gollary Riýad Marez (7), Bernardu Silwa (17, 44), Filip Foden (32), Rahim Sterling (58) geçirdi.
