Dubaýyň almaz biržasy agramy 1086,10 karat bolan gymmat bahaly göwheriň satyn alynmagy üçin tender geçirýär. Bu daş Dubaýda häzire çenli satuwa çykarylanlaryň arasynda gymmat bahaly iň uly işlenilmedik almazdyr.
Ol Afrikanyň günorta böleginde tapyldy. Daşyň göwrümi dünýäniň dürli künjeginden hünärmenleri özüne çekdi. Olar satuwdan öň göwheri görmek üçin Dubaýa geldiler.
Kion International tarapyndan geçirilýän tender 21-nji fewrala meýilleşdirilen Dubaýyň almaz konferensiýasynyň öňüsyrasynda geçiriler. 2022-nji ýylda birža eýýäm 6 sany uly tender geçirdi, olarda jemi 300 mln ABŞ dollaryndan gowrak bahada almaz satyldy.
Ýatlap geçsek, Dubaýda 3-nji fewraldan 9-njy fewral aralygynda onlaýn söwdalar geçirildi we olarda 555,55 karat agramly dünýädäki iň uly gara göwher satuwa çykaryldy. Auksionyň guramaçysy bolup Sotheby's auksion öýi çykyş etdi.
"Enigma" atly gymmat bahaly daş 20 ýyldan gowrak wagt hususy kolleksiýada saklandy we açyk satuwa çykarylmady. Gara göwher karbonado hökmünde-de bellidir - onuň düzümindäki uglerod izotoplary we ýokary kislorod düzümi bu gymmatly daşyň başga planetadan gelip çykyşy baradaky teoriýalary gurmaga mümkinçilik berýär.
"Enigmany" gaýtadan işlemek üçin birnäçe ýyl sarp edildi, şondan soň daş 55 grana eýe boldy. 2004-nji ýylda tebigy gara göwher Şweýsariýanyň "Gýubelin" barlaghanasy we Amerikanyň Gemmalogiýa instituty tarapyndan dünýäde iň ulusy hökmünde hasaba alyndy - onuň agramy 555,55 karat, ýagny 111 gram töweregidir. 2006-njy ýylda ol dünýäde iň uly granlanan almaz hökmünde Ginnesiň rekordlar kitabyna girdi.
