Apple kompaniýasynyň işjeň gurluşlarynyň sany 1,8 mlrd birlige barabar boldy. Bu barada Appleinsider neşiri habar berýär diýip, lenta.ru belleýär.
Žurnalistler kompaniýanyň çärýek hasabatyna salgylanýarlar. Apple-iň maglumatlaryna görä, 2022-nji ýylyň başynda brendiň işjeň gurluşlarynyň sany iki milliarda golaýlap, takmynan, 1,8 mlrd birlik boldy. Işjeň gajetler diýlip, häzirki wagtda eýeleri tarapyndan ulanylýan enjamlara düşünilýär.
Kompaniýanyň hünärmenleri ep-esli ösüşi bellediler: 2021-nji ýylda kompaniýa 1,65 mlrd gajetiň – smartfonlaryň, planşetleriň, kompýuterleriň we beýleki enjamlaryň bardygyny hasaplady. Kompaniýanyň analitikleri ösüşiň esasy sebäbi hökmünde pandemiýa döwründe brendiň enjamlaryna bolan islegiň ýokarlanmagyny bellediler.
Analitikleriň hasaplamasy boýunça, 2019-njy ýyldan 2020-nji ýyla çenli Apple-iň ekosistemasyna, takmynan, 100 mln, 2020-nji ýyldan 2021-nji ýyla çenli 150 mln, 2022-nji ýyla çenli ýene-de 150 mln enjam goşuldy. Kompaniýanyň 2021-nji ýylyň oktýabr aýyndan dekabr aýy aralygynda çärýek girdejisi 123,9 mlrd dollar bolup, bu bir ýyl ozalkydan 11 göterim köpdür. Çärýekde iPhone satuwy 76,1 mlrd dollar girdeji getirdi.
