Apple kompaniýasynyň girdejisi geçen çärýegiň jemi boýunça 2020-nji ýylyň görkezijisi bilen deňeşdirilende 11% ýokarlandy we tas 124 mlrd dollara ýetip, täze rekord goýdy. Muny kompaniýanyň saýtynda ýerleşdirilen hasabaty delillendirýär diýip, TASS habar berýär.
2021-nji ýylyň 25-nji dekabrynda tamamlanan üç aýlyk hasabat döwrüniň dowamynda Apple-iň girdejisi 123,9 mlrd dollara ýetdi. 2020-nji ýylyň degişli döwründe bu görkeziji 111,4 mlrd dollara deňdi. Kompaniýanyň geçen çärýegiň jemi boýunça arassa girdejisi geçen ýylyň degişli döwründäki 28,7 mlrd dollar bilen deňeşdirilende 34,6 mlrd dollara barabar boldy. Kompaniýanyň esasy önümi iPhone bolmagynda galýar, tutuş dünýäde bu smartfonlaryň satuwyndan gelýän girdeji çärýekde 71,6 mlrd dollar boldy.
“Bu çärýegiň rekord netijelerini biziň tutuş taryhda innowasiýa taýdan has ösen önümler we hyzmatlar hatarymyzyň üsti bilen gazanmak mümkin boldy” – diýip, kompaniýanyň baş direktory Tim Kuk belledi.
