«Barselona» klubyň direktorlar geňeşiniň nobatdaky mejlisiniň netijeleri boýunça resmi beýanat bilen çykyş etdi. Klubyň ýolbaşçylygy öňki prezidenti Žozep Bartomeunyň işini öwrenmek üçin içerki derňew işlerini geçirdi. Belläp geçsek, Bartomeu wezipesinden aýrylandan soň, klub batmaň bär ýanyna bardy diýip, sports.ru habar berýär.
«Sişenbe güni, 1-nji fewralda öňki prezidentlik dolandyrylyşy döwründe klubyň işinde mümkin bolan düzgün bozulmalary ýüze çykarmak maksady bilen geçirilen jikme-jik derňewiň we maliýe auditiniň netijeleri çap ediler.
Derňewiň barşynda ýüze çykarylan deliller eýýäm Barselonanyň prokuraturasyna iberilen hasabata goşuldy» — diýlip, katalon klubynyň beýanatynda aýdylýar.
Žozep Bartomeu 2014-nji ýylyň ýanwaryndan 2020-nji ýylyň oktýabry aralygynda «Barselonanyň» prezidenti boldy. Ol parahorlukda, şeýle hem klubyň adyndan amala aşyrylýan geleşiklerden şahsy bähbidini aramaklykda aýyplanylýar.
Transfermarkt-yň maglumatlaryna görä, Bartomeunyň ýolbaşçylygynda katalonlylar täze oýunçylary almaga 1,2 mlrd ýewro sarp etdiler, şol bir wagtda transfer girdejileri 830 mln ýewro. Şolardan 222 mln-y klub braziliýaly hüjümçi Neýmary satandygy üçin gazandy.
