Koreýa Respublikasynda koronawirus ýokanjyny anyklamak we bejermek üçin täze ulgam ulanylyp başlandy. Kesellere gözegçilik we öňüni alyş boýunça milli edaranyň habar bermegine görä, täze çäreleriň maksady ýurtda agdyklyk edýän koronawirusyň omikron-ştammynyň ýaýramagyny saklamakdan ybaratdyr. Bu barada TASS habar berýär.
Täze görkezmelere laýyklykda, ýokary töwekgelçilikli toparlardan bolan syrkawlar PZR-barlaglaryny, galan syrkawlar bolsa antigen üçin ekspress-barlaglary tabşyrarlar. Doly sanjym alan COVID-19 keselli hassalar üçin karantin möhleti 10-dan ýedi güne çenli azaldyldy.
Ilkibaşda täze ulgam ýurduň omikron-ştammyň iň köp ýaýran dört sebitinde – Çoll-Namdo welaýatynda, Kwanju şäherinde, Kýongido welaýatynyň Phýonthek we Anson şäherlerinde ulanylar. 29-njy ýanwardan ol ýurduň ähli ýerine ýaýrar.
Kesellere gözegçilik we öňüni alyş edarasynyň maglumatlaryna görä, 25-nji ýanwarda ýurtda koronawirus bilen kesellemegiň 13 012 täze hadysasy hasaba alyndy. Bu 2020-nji ýylyň 20-nji ýanwarynda Günorta Koreýada kowid bilen kesellän ilkinji hassa ýüze çykarylandan bäri iň ýokary görkezijidir. Geçen hepde bilen deňeşdirilende, ösüş üç esseden gowrak bolup, bu täze “omikron” ştammynyň ýaýramagy bilen baglanyşyklydyr.
