Tonganyň golaýynda Ýuwaş ummanynda sunaminiň döremegine getiren Hunga-Tonga-Hunga-Haapaý suwasty wulkanynyň atylmagyndan ýetirilen zyýan häzire çenli çaklanyşyndan has uly zyýanlar ýetirdi. NASA-nyň hünärmenleriniň pikiriçe, Günorta Ýuwaş ummany sebitindäki tebigy hadysa Hirosima taşlanan atom bombasynyň partlamasyndan ýüzlerçe esse güýçli boldy diýip BBC News habar berýär.
Soňky barlaglaryň netijelerine görä, wulkan bilen adybir Hunga-Tonga-Hunga-Haapaý adasynyň aglaba bölegi Ýer ýüzünden ýegsan boldy diýen ýaly. Wulkan atylmasyna çenli ol iki sany adam aýak basmaýan adadan — Hunga-Tonga we Hunga-Haapaý adalaryndan ybaratdy. 2014-nji ýylda bu adalar wulkan täsirleşmesi netijesinde bir ada birikdi. Indi adany birleşdirýän aralyk dolulygyna ýumruldy, iki sany gadymy adadan bolsa kiçi bölekler galdy.
Ýuwaş ummanynda tebigy hadysadan adam ýaşaýan adalardan Tonga patyşalygynyň arhipelagy has köp zyýan çekdi. BMG-niň maglumatlaryna görä, bu tebigy hadysanyň täsirlerini adadaky döwletiň 80% ilaty duýdy. Üç adam aradan çykdy.
Tonganyň paýtagty Nukualofa 1,2 metrlik tolkun aralaşdy. Şäher ýaşaýjylary belentliklere çykyp halas boldular. Şäher hassahanasy tolkun bilen ýegsan boldy, halas edijiler meýdan hassahanasyny gurnadylar.
Ähli güýçler ýeke-täk halkara howa menziliniň uçuş-gonuş zolagyny arassalamaga gönükdirildi.
