Beýik Britaniýanyň hökümeti yssy howa we gurakçylyk sebäpli suwy tygşytlamak boýunça maslahatlary hödürledi. Hususan-da, häkimiýetler ýurduň ýaşaýjylaryna köne elektron hatlary bozmagy maslahat berdi diýip, Tom’s Hardware neşiri belleýär.
Gurakçylyk bilen göreş boýunça milli topar (oňa meteogulluklar, hökümet wekilleri we suw üpjünçiligi bilen meşgullanýan kompaniýalar) ýagdaýy “adatdan daşary” diýip atlandyrdy. Ýurduň bäş sebitinde resmi taýdan gurakçylyk yglan edildi, derýalarda we suw ammarlarynda suwuň derejesi azalmagyny dowam etdirýär. Independent-iň maglumatlaryna görä, 2025-nji ýylyň birinji ýarymy 1976-njy ýyldan bäri iň gurak döwür boldy.
Beýik Britaniýanyň hökümet saýtyndaky habarda suwuň sarp edilişini azaltmak üçin ygtyýarly edaralar tarapyndan görülýän çäreler agzalýar, şeýle-de “öý şertlerinde” suwy tygşytlamaga kömek etjek usullar sanalyp geçilýär. Hususan-da, häkimiýetler ýaşaýjylara şulary maslahat berýär:
- Suwa düşmegiň wagtyny azaltmak;
- Unitazlarda syzmalary düzetmek;
- Ýagyş suwuny ýygnamak üçin gap goýmak we ony baglary suwarmak üçin ulanmak.
- Otlary suwarmazlyk;
- Köne elektron hatlary we suratlary bozmak, çünki maglumat merkezleri ulgamlary sowatmak üçin has köp suw talap edýär.
Tom’s Hardware soňky punktyň manysyzdygyny, çünki maglumat merkezlerinde esasy suw çykdajysynyň maglumatlary saklamak bilen däl-de, prosessorlaryň işi bilen baglanyşyklydygyny ýazýar. Faýllary gözlemek we bozmak, tersine, goşmaça hasaplaýyş amallaryny talap edýär, şonuň üçin görkezme, has dogrusy, ters netije berip biler.
Oksford uniwersitetiniň gözleglerine görä, hatda uly bolmadyk maglumat merkezi hem ýylda, takmynan, 26 mln litr suw sarp edýär diýip, Independent ýazýar.
