Netflix platformasy 2022-nji ýylda koreý dilinde 25-den gowrak serial, şou we film çykarmagy meýilleşdirýär. Yonhap agentliginiň habar bermegine görä, bu striming hyzmaty üçin originalda günorta koreý taslamalarynyň rekord sanydyr. Muny TASS ýetirýär.
«Netflix koreý hekaýalarynyň üstünligini dowam etdirmegi maksat edinmek bilen, şu ýyl 25-den gowrak koreý filmini çykarar. Biz tomaşaçylaryň isleglerine laýyk gelýän eksklýuziw döredijilik wakalaryny we ýokary hili hödürläris» - diýip, agentlik Netflix-iň beýannamasynyň sözlerini getirýär.
2021-nji ýylda Netflix ulanyjylary koreý dilinde 20 sany täze wideoönümine tomaşa edip bildiler. Olaryň arasynda «Kalmar oýny», «Dowzahyň çagyryşy» we «Rahatlyk deňzi» ýaly meşhur seriallar bar. «Kalmar oýny» Netflix-iň iň üstünlikli serialy hökmünde taryha girdi. 17-nji sentýabrda çykandan soň ilkinji dört hepdede tomaşaçylar bu serialy görmek üçin 1,65 milliard sagatdan gowrak wagt sarp etdiler. Kartinada diri galmagyň gizlin oýny barada gürrüň berilýär, ýagny onda durmuşy kyn ýagdaýa düşen adamlar uly pul baýragyny almak üçin janlaryny howp astyna salýarlar.
