Ford kompaniýasynyň bazar kapitallaşdyrmasy ilkinji gezek 100 mlrd dollardan geçdi – 13-nji ýanwarda geçirilen söwdada onuň paýnamalarynyň bahasy 20 ýylda iň ýokary derejesine, ýagny bir kagyz üçin 25,87 dollara ýetdi. Awtoöndürijileriň arasynda bazar bahasy boýunça Ford indi dördünji orny eýeleýär – ondan öňde Tesla, Toyota we Volkswagen bar diýip, CNBC belleýär. Muny forbes.ru ýetirýär.
Kompaniýanyň paýnamalarynyň bahasy 5,7% ýokarlanyp, bir kagyz üçin 25,87 dollara ýetdi. 13-nji ýanwardaky maglumatlar boýunça, awtokonserniň bazar bahasy 102 mlrd dollar boldy. Şeýle ösüşe Ford-yň elektromobilleriň, şol sanda Mustang Mach-E krossoweriniň we meşhur F-150 pikapynyň elektrik görnüşiniň önümçiligini artdyrmagy ýardam eden bolmagy mümkin. Olardan soňkusy şu ýazda bazara çykmaly.
EV-awtomobilleriniň önümçiliginiň artdyrylmagy kompaniýanyň özgeriş meýilnamasynyň bir bölegidir. Bu meýilnama kompaniýanyň baş direktory Jim Farli tarapyndan öňe sürüldi. Ol kompaniýa 2020-nji ýylyň oktýabrynda ýolbaşçy boldy.
Ford 100 mlrd dollardan ýokary kapitallaşdyrma bilen General Motors-dan (bazar bahasy - $90 mlrd) we Rivian-dan ($75 mlrd) öňe geçdi. Şol bir wagtyň özünde, kompaniýa Tesla (1 trln dollardan gowrak), Toyota ($346 mlrd) we Volkswagen ($121 mlrd) kompaniýalaryndan yza galýar. Tesla-nyň kapitallaşdyrmasy geçen ýylyň oktýabr aýynda 1 trln dollardan geçdi we şol ýylyň dekabr aýynda ýene-de bu görkezijä gaýdyp geldi.
