2021-nji ýylyň jemi boýunça FAO-nyň azyk bahalarynyň ortaça indeks derejesi 125,7 punkt boldy – bu 2020-nji ýylyň görkezijilerinden 28,1% ýokarydyr. Bu barada BMG-niň Azyk we Oba hojalygy guramasy – FAO habar berýär diýip, Day.Az belleýär.
“Adaty şertlerde ýokary bahalar önümçiligiň möçberiniň artmagyna getirýär, ýöne çykarylýan serişdeleriň bahalarynyň ýokarlanmagy, dowam edýän global pandemiýa we garaşylmadyk howa şertleri 2022-nji ýylda bazardaky ýagdaýyň durnuklaşmagyna az umyt döredýär” – diýip, FAO-nyň uly ykdysatçysy Abdulreza Abbassýan aýtdy.
2021-nji ýylyň jemi boýunça FAO-nyň däneli ekinler üçin baha indeksiniň ortaça derejesi 2012-nji ýyldan bäri iň ýokary derejä ýetdi we geçen ýylyň görkezijisinden 27,2% ýokary boldy: mekgejöweniň bahasy 44,1%, bugdaýyň bahasy 31,3% ýokarlandy, şol bir wagtyň özünde tüwiniň bahasy 4,0% arzanlady.
Şeýle-de, 2021-nji ýylyň jemi boýunça FAO-nyň ösümlik ýagy üçin baha indeksiniň ortaça derejesi 2020-nji ýyl bilen deňeşdirilende 65,8% ýokarlanyp, iň ýokary derejä ýetdi.
2021-nji ýylda FAO-nyň şeker üçin baha indeksi 2020-nji ýyl bilen deňeşdirilende 29,8% ýokarlandy, bu hem 2016-njy ýyldan bäri iň ýokary ortaça ýyllyk görkezijidir. 2021-nji ýylyň jemi boýunça FAO-nyň et üçin baha indeksiniň ortaça derejesi 2020-nji ýyla garanyňda 12,7% ýokary boldy. Süýt önümleri üçin baha indeksiniň ortaça derejesi 2020-nji ýyldaky derejeden 16,9% ýokary boldy.
