2021-nji ýylda Müsürdäki Sues kanalynyň girdejisi 6,3 mlrd dollara ýetdi, bu hem kanalyň taryhynda iň ýokary görkeziji boldy. Bu barada bu suw gatnaw ýolunyň administrasiýasynyň ýolbaşçysy Usama Rabia aýtdy. Muny TASS ýetirýär.
“2021-nji ýylyň dowamynda kanalyň taryhynda täze we görlüp-eşidilmedik rekordlar goýuldy, çünki ýyllyk girdeji 6,3 mlrd dollara ýetdi. Bu iň ýokary görkezijidir” – diýip, “Al-Ýaum as-Sabia” täzelikler portaly onuň sözlerini getirýär. Bu 2020-nji ýyl bilen deňeşdirilende 12,8% köpdür, şonda kanal 5,6 mlrd dollar girdeji getiripdi.
Mundan başga-da, Rabianyň aýtmagyna görä, ýyllyk arassa tonnaž hem rekord derejä ýetdi, ýagny ol 1,27 mlrd tonnadan geçdi. Bu geçen ýylky görkezijilerden 8,5% köpdür. Umuman alanyňda, kanal bilen iki tarapa 2020-nji ýyldaky 18 830 bilen deňeşdirilende, 20 694 gämi geçdi.
Şlýuzsyz Sues kanaly 1869-njy ýylyň noýabr aýynda gämi gatnawy üçin açyldy. Onuň işe girizilmegi Aziýadan Ýewropa deňiz ýoluny söwda we harby gämileri üçin azyndan 8 müň km azaltmaga mümkinçilik berdi. Häzirki wagtda kanalyň uzynlygy, takmynan, 160 km, çuňlugy 20 metrden gowrak bolup, bu dünýäniň iň uly gämilerine, şol sanda iň uly nebit tankerlerine-de geçmäge mümkinçilik berýär.
