Ýaponiýanyň ýaşaýjysy, Ginnesiň rekordlar kitabyna görä, häzirki wagtda dünýäniň iň garry zenany Kane Tanaka özüniň 119 ýaşyny belledi. Garyndaşlarynyň aýtmaklaryna görä, özüni 120 ýaşyna çenli ýaşamak maksadyny goýdy. Bu barada Kyodo agentligine salgylanyp, news.ru habar berdi.
1903-nji ýylda doglan Kane Tanaka maşgalada ýedinji çagadyr. Ol 19 ýaşynda durmuşa çykypdyr. 1937-nji ýylda bolsa Ýaponiýa bilen Hytaýyň arasyndaky söweşde adamsy bilen uly ogluny ýitiripdir.
Ýapon zenany bütin ömrüne unaş (lapşa) satylýan dükanda işläpdir. 1970-nji ýyllarda pensiýa çykandan soň, Tanaka köp ýerlere syýahat edipdir.
2005-nji ýyldan bäri bu aýal garrylar öýünde ýaşaýar. Ol stol üstündäki oýunlary, gazly suwy we şokolady gowy görýär diýip, çeşme belleýär.
