2022-nji ýylyň 1-nji ýanwaryndan Gazagystanyň Salgyt kodeksine «Google-a salgyt girizmekligi» göz öňünde tutýan üýtgetmeler girizildi. Bu barada Interfaks agentligi ýurduň Milli ykdysadyýet ministrligine salgylanyp habar berdi.
Indiden beýläk, hyzmatlaryny we harytlaryny onlaýn-platformalaryň üsti bilen amala aşyrýan daşary ýurt kompaniýalarynyň ählisi Gazagystanyň býujetine GBS (goşulan baha üsti salgydy) tölemeli bolarlar. Bu kompaniýalardan satylan harytlaryň we ýerine ýetirilen hyzmatlaryň bahasyndan 12%-i alnar.
Ýerli salgyt töleýjilere bu degişli bolmaz.
Ministrlikde çaklamalaryna görä, bu GBS salgydyndan býujete geljek pul serişdeleri ýylda 2 milliard teňňä barabar bolar.
Şol bir wagtda kompaniýalara salgyt hasabyna durmak zerur bolmaz. Rejelenen tertibe görä, olar salgyt edaralaryna hat ibermeli we GBS-i tölemäge taýýarlygy barada habarly etmeli.
Dolandyryş daşary ýurt internet kompaniýalarynyň Merchant ID/MID-iň üsti bilen geçiren pul möçberleri hakynda banklaryň maglumatlarynyň esasynda amala aşyrylar.
Merchant ID — bu banklaryň degişli tölegleri we pul geçirimlerini hasaba aljak daşary ýurt internet-kompaniýalary tarapyndan hödürlenilýän rekwizitleriň bir görnüşidir.
