Täze ýylyň öňüsyrasynda Aýazbaba çagalara täsinlik getirmek, olaryň arzuwlaryny hasyl etmek üçin körpeleriň öýlerine barýar. Aşgabat şäherindäki 64-nji orta mekdebiň okuwçysy Ibraýym Rüstemow köp sanly bagtyýar çagalaryň biri boldy. Täze ýyl baýramynyň öňüsyrasynda onuň arzuwy hasyl boldy.
Irden Rüstemowlaryň maşgalasynyň ýaşaýan öýüne arzyly myhmanlar — Aýazbaba hem-de onuň agtygy Garpamyk geldiler. Ibraýym olary uly şatlyk bilen garşylady, çünki ol täsin myhmanlara arzuwly hatyny ibereni bäri garaşýardy. Ol bu barada ýurdumyzyň Baş arçasynyň öňünde geçirilen dabara mahalynda Prezident Gurbanguly Berdimuhamedowa gürrüň beripdi. Oglanjyk döwlet Baştutanynyň onuň Aýazbaba ýollan hatynyň mazmuny barada gyzyklanandygyny buýsanç bilen habar berdi. Şol hatda ol ýurdumyzyň Prezidenti bilen surata düşmek hem-de täze welosipedi sowgat almak mümkinçiligi barada haýyş edipdi.
Mälim bolşy ýaly, oglanjygyň arzuwynyň birinjisi öňküsi gün hasyl boldy. Şonda ol Baş arçanyň öňündäki dabaranyň barşynda türkmen Lideri bilen surata düşdi. Indi bolsa Aýazbaba Ibraýymyň arzuwyny amala aşyryp, oňa Prezident Gurbanguly Berdimuhamedowyň adyndan täze, ak reňkli welosipedi gowşurdy. Oglanjygyň bu pursatda begenjiniň çägi bolmady. Ol sowgady uly hoşallyk duýgusy bilen kabul etdi.
