Intel tehnologik taýdan artykmaçlygyny täzeden dikeltmek üçin Fransiýada, Germaniýada we Italiýada önümçilik desgalarynyň hataryny giňeltmegi meýilleşdirýär. Bu barada Bloomberg habar berýär.
Intel-iň global maksatnamasy Fransiýada ylmy-barlag merkeziniň we Italiýada synag we gurnama zawodynyň gurluşygyny öz içine alýar. Kremniý plastinini öndürjek esasy zawodyň bolsa Germaniýada gurulmagynyň mümkindigi aýdylýar.
Intel 2022-nji ýylda täze zawodlaryň we enjamlaryň gurluşygy üçin 28 milliard dollar sarp etmegi meýilleşdirýär. Deňeşdirmek üçin bellesek, kompaniýa 2021-nji ýylda munuň üçin, takmynan, 18 milliard dollar harçlapdy. Kompaniýanyň ýerine ýetiriji müdiri Pet Gelsinger Aziýanyň agalygyny deňagramlaşdyrmak we TSMC-den we Samsung-dan yza galmazlyk üçin ABŞ-da we Ýewropada önümçiligi ösdürmek isleýär. Maýa goýujylar bolsa çykdajylaryň ýokarlanmagynyň girdejä ýetirip biljek täsiri babatda aladalanýarlar. Ýeri gelende bellesek, Intel-iň paýnamalary 2021-nji ýylda bary-ýogy 2,3 göterim ýokarlandy.
