10-njy dekabrda Ministrler Kabinetiniň Başlygynyň orunbasary, daşary işler ministri Raşid Meredowyň «Parahatçylyk we ynanyşmak syýasaty – halkara howpsuzlygyň, durnuklylygyň we ösüşiň binýady» atly halkara maslahata gatnaşmak maksady bilen Aşgabada gelen Ýewropa Bileleşiginiň Merkezi Aziýa boýunça Ýörite wekili, ilçi Teri Hakala bilen duşuşygy geçirildi.
Işjeň ýagdaýda geçirilen gepleşikleriň barşynda Türkmenistanyň Ýewropa Bileleşigi bilen hyzmatdaşlygynyň has-da giňeldilmegine berk ygrarlydygy tassyklanyldy we geljekde Türkmenistanyň ÝB bilen syýasy-diplomatik, söwda-ykdysady we medeni-ynsanperwer gatnaşyklarynyň ösdürilmeginiň derwaýyslygy nygtaldy.
Şu nukdaýnazardan, özara hereketleriň häzirki hereket edýän ikitaraplaýyn gurallarynyň, hususan-da, «Ýewropa Bileleşigi – Тürkmenistan», Parlamentara dialogyň, Adam hukuklary boýunça dialogyň, daşary syýasat edaralarynyň arasynda we hyzmatdaşlygyň aýry-aýry meseleleri boýunça konsultatiw duşuşyklaryň, şol sanda «Ýewropa Bileleşigi – Merkezi Aziýa» formatyndaky özara hereketleriň netijeliligi beýan edildi. Duşuşygyň çäklerinde howpsuzlyk, durnukly ösüş we ynsanperwerlik ugry boýunça alnyp barylýan gatnaşyklaryň giň toplumy boýunça durmuşa geçirilýän sebitleýin taslamalaryň iş ýüzündäki oňyn netijesi nygtaldy.
