Ispaniýada La-Palma adasyndaky wulkan gysga möhletleýin ümsümlikden soň gaýtadan atylmaga başlady diýip, Kanar adalarynyň Wulkanologiýa institutynyň Twitterdäki sahypasynda habar berilýär diýip, gazeta.ru belleýär.
“589 bina ýumruldy, 258 gektar lawa akymlary bilen örtüldi, 21 km ýol zaýalandy” – diýlip, habarda aýdylýar.
Wulkan gysga wagtlyk ümsümlikden soň täze güýç bilen lawa atyp başlady. Adada öýleri howp astynda galan, takmynan, 6 müň ýaşaýjy ewakuasiýa edildi.
Ispaniýanyň häkimiýetleri La-Palma adasyny wulkanyň atylmagy sebäpli tebigy betbagtçylyk zolagy diýip yglan etdiler. Bu hökümete betbagtçylyk sebäpli öýsüz galan raýatlaryň jaý almagy we ilkinji nobatda zerur bolan zatlary satyn almagy üçin 10,5 mln ýewro bölüp bermäge mümkinçilik berer.
Ispaniýanyň 85 müň raýatynyň ýaşaýan we Kabesa-de-Waka hem-de El-Paso ilat sebitleriniň ýerleşýän Atlantik ummanyndaky La-Palma adasynda Kumbre-Wýeha gerşinde wulkanyň atylandygy 20-nji sentýabrda irden belli boldy. Ondan öň seýsmologlar 25 müňden gowrak ýerasty sarsgynlaryny we 4,2 bal ululykda ýertitremesini hasaba aldylar. Bu wulkan eýýäm ýüz ýyldan gowrak wagt bäri şeýle işjeňligi görkezmändi. Mundan öň wulkan 1971-nji ýylda atyldy.
