Angliýanyň Rolls-Royce kompaniýasy özüniň ilkinji doly elektrik uçary bolan Spirit of Innovation-y üstünlikli synagdan geçirdi. Ol Beýik Britaniýanyň Goranmak ministrliginiň aerodromyndan uçup, howada 15 minut töweregi boldy. Bu barada kompaniýanyň resmi saýty habar berýär diýip, ren.tv belleýär.
Uçaryň elektrik hereketlendirijisiniň kuwwaty 400 kilowatta (544 at güýji) barabar. Bu uçara tizligi sagatda 482 km çenli güýçlendirmäge mümkinçilik berýär. Hereketlendiriji 6000 öýjükden ybarat bolan “awiasiýada has köp energiýa sarp ediji akkumulýator batareýinden” iýmitlenýär.
Minutda 2400 aýlaw ýygylygy bilen üç perli enjam 90 göterime ýetýän iň ýokary energiýa netijeliligi göz öňünde tutulyp döredildi.
Bu elektrik uçarynyň döredilmegi we synagdan geçirilmegi Britaniýanyň hökümeti tarapyndan ýarym maliýeleşdirilýär. Bu uglerod zyňyndylary nol derejeli bolan awiaulaglaryny ösdürmek boýunça maksatnamanyň bir bölegidir.
Spirit of Innovation uçaryny aerotaksi hökmünde ulanmak göz öňünde tutulýar, muňa garamazdan Rolls-Royce elektrik kuwwatly gurluşy bolan doly göwrümli ýolagçy uçaryny hem işläp taýýarlaýar. Kompaniýa 2050-nji ýyla çenli ekologiýa taýdan hapa önümleriň çykarylmagyny doly derejede bes etmegi meýilleşdirýär.
