ABŞ-nyň fond biržasynyň maglumatlaryna görä, Apple kompaniýasynyň paýnamalary 1,83%, bir paýnama üçin 146,06 dollara çenli pese düşdi. Şeýlelik bilen, kompaniýanyň häzirki bazar bahasy 2,41 trillion ABŞ dollaryna deň boldy. Bir günde kompaniýanyň bazar kapitallaşdyrmasy tas 45,1 mlrd pese düşdi. Bu barada www.ixbt.com habar berýär.
Anna güni iPhone 13 üçin deslapky sargytlar kabul edilip başlandy. Netijede, smartfon deslapky sargytlaryň sany boýunça geçen ýyl çykarylan iPhone 12-den öňe geçdi: degişli döwürde 2 we 1,5 mln deslapky sargyt kabul edildi. Mundan başga-da, ABŞ-da, Beýik Britaniýada we dünýäniň beýleki ýurtlarynda smartfonlara bolan isleg artýar, ýöne käbir modelleriň gowşurylyş möhleti bir aý yza süýşürilýär.
Umuman aýdanyňda, bu habarlar kompaniýanyň paýnamalaryna arzanlamagy bes etmäge kömek etmedi, bu eýýäm soňky iki hepdäniň dowamynda, 7-nji sentýabrdan bäri hasaba alynýar. Öň habar berşimiz ýaly, iPhone 13-iň tanyşdyrylyş gününde-de kompaniýanyň paýnamalary arzanlady.
Analitikleriň pikiriçe, bu Apple-iň Epic Games-e garşy işi bilen bagly kazyýetiň çykaran karary bilen baglanyşyklydyr. Federal kazy Apple-e App Store-iň iş modelini üýtgetmegi buýurdy, şondan soň paýnamalar karar çykarylandan soň dört aýyň dowamynda iň uly pese gaçyşy görkezdi, kompaniýanyň bazar bahasy bolsa 85 milliard dollar pese düşdi. Belläp geçsek, indi Apple diňe 30 göterim komissiýa bilen App Store-iň üsti bilen däl-de, beýleki hyzmatlaryň üsti bilen hem programma töleglerine rugsat bermeli.
Bu karar 9-njy dekabrda güýje girer.
