«Belfast» iňlis filmi 46-njy Toronto halkara film festiwalynyň (TIFF) Gran Pri baýragyna eýe boldy. Bu barada çäräniň guramaçylaryna salgylanyp, TASS habar berdi.
Iňlis režissýory Kennet Branyň ýarym terjimehal dramasynda bir oglanjygyň çagalygy hakda gürrüň berilýär. Oglanjygyň keşbini on ýaşly Jud Hilliň janlandyrandygy bellenilýär. Filmiň bütindünýä premýerasy Torontoda bolup, ol 12-nji noýabrda prokatlara ýaýrar.
Toronto halkara film festiwaly 9-18-nji sentýabr aralygynda geçirildi. Bu ýyl onda jemi 132 film görkezildi. Toronto film festiwaly 1976-njy ýyldan bäri geçirilmek bilen, ol dünýäniň iň uly film görkezilişleriniň biri hasaplanýar. Beýleki film festiwallaryndan tapawutlylykda, TIFF-de resmi emin ýok we esasy baýrak bolan "Tomaşaçylaryň söýgüsi baýragy" tomaşaçylaryň ses berişliginiň netijelerine esaslanyp berilýär. 2020-nji ýylda festiwalda asly hytaýly bolan ABŞ-ly režissýor Hloe Çžaonyň “Çarwalar ýurdy” filmi ýeňiji bolupdy.
