Braziliýanyň Espiritu-Santo ştatynyň demirgazygyndaky Ibirasu buddizm monastyrynda gurnalan ägirt uly Budda heýkeli ululygy boýunça Hytaýyň Leşan şäher okrugyndaky Buddadan soň dünýäde ikinji boldy. Bu barada Remonews portaly habar berýär diýip, iz.ru belleýär.
Metaldan we betondan bolan gurluşyň agramy 350 tonna bolup, beýikligi 35 metre ýetýär. Ony islendik wagt mugt baryp görmek bolýar. Bu heýkel beýikligi münbersiz 30 metr bolan Rio-de-Žaneýrodaky Hristos-Halasgäriň heýkelinden hem uludyr. 2020-nji ýylyň dekabr aýynda heýkel buddizmiň esaslaryna laýyklykda ruhy çokundyrmaklygy kabul etdi. Bu dabara “gözleri açmak” diýlip atlandyrylýar we ýadygärlige “jan” berýär.
BR-101 kenaryndaky heýkel heniz resmi açylyşyndan öň ştatyň syýahatçylyk merkezine öwrülmek bilen, şosseden geçýänleriň ünsüni özüne çekýär. Monastyryň maglumatlaryna görä, dynç günleri ýadygärlik 4000-e golaý adamy kabul edýär.
Heýkeliň üstündäki işler 2020-nji ýylda tamamlandy, onuň açylyşy şol ýylyň iýun aýyna meýilleşdirildi. Ýöne işleriň gijikdirilmegi we pandemiýa sebäpli monastyr çäräni 2021-nji ýylyň aprel aýyna süýşürmek kararyna geldi. Möhlet ikinji gezek yza süýşürilenden soň, onuň açylyşy şenbe güni geçirildi.
Belläp geçsek, häzirki wagtda Braziliýada uly göwrümli birnäçe heýkel bar. Mysal üçin, 2014-nji ýylda Braziliýanyň demirgazyk-gündogarynda Fatima Bogorodisasynyň 45 metrlik heýkeli açyldy, 2010-njy ýylda bolsa Riu-Grandi-du-Norte ştatynda beýikligi 56 metr bolan Keramatly Rita Kaşiýskaýanyň heýkeli oturdyldy. Ýurtda iň uly ýadygärlik ABŞ-nyň Azatlyk heýkeliniň nusgasydyr. Ol Barra-Welýa şäherinde Havan gipermarketiniň duralgasynda oturdyldy.
