Hytaýyň Milli halk kongresiniň (parlament) hemişelik komiteti Ilat we önelgelilik meýilnamalaşdyryş kanunyna üýtgetmeleri girizdi. Oňa laýyklykda, hytaýly maşgalalara üç çaga çenli dogurmaga kanuny taýdan rugsat berildi. Bu barada Sinhua habar gullugyna salgylanyp, TASS habar berdi.
Habar berilmegine görä, kanunyň täze redaksiýasy döwletiň ýaşlykdan nikalaşmagy we çaga dogurmagy wagyz etjekdigini görkezýär. Mundan başga-da, ýurduň häkimiýetleri çagasy bolan ýaş maşgalalar üçin maliýe, salgyt, ätiýaçlandyryş, bilim we ýaşaýyş jaý ýeňilliklerini girizmegi, şeýle hem ene-atanyň ýaş nesliň dünýä inmegi hem-de terbiýesi üçin çykdajylaryny, bilim hyzmatlaryny azaltmagy maksat edinýärler. Şeýle hem, döwlet ýerli häkimiýetleri we iş berijileri ýaş çaga terbiýeleýän işgärlere goşmaça rugsat bermäge höweslendirer.
Belläp geçsek, Hytaý Kommunistik partiýasynyň Merkezi komitetiniň Syýasy býurosy maşgalalara üç çaga dogurmaga rugsat bermek kararyna şu ýylyň maý aýynda geldi. Iýul aýynda bolsa Hytaý Halk Respublikasynyň Döwlet Geňeşi degişli jerimeleri ýatyrdy we ýaş maşgalalara amatly ýaşaýyş jaýyny bermek hem-de 3 ýaşa çenli çagalara goldaw bermek üçin salgydy aýyrmak meselesine garamak meýilnamasyny yglan etdi.
