Russiýanyň awiakompaniýalary 2035-nji ýyla çenli ýolagçy akymyny 2019-njy ýyl bilen deňeşdirilende, 63%, 209 mln ýolagça çenli artdyrar. Bu RF-iň 2035-nji ýyla çenli döwür üçin çaklamasy bilen 2030-njy ýyla çenli transport strategiýasynyň taslamasyndan gelip çykýar diýip, TASS habar berýär.
Şol bir wagtyň özünde, 2025-nji ýylda ýolagçy akymy 147,4 mln, 2030-njy ýylda 177 mln ýolagçy bolar diýlip, resminamada görkezilýär. 2019-njy ýylda awiakompaniýalar rekord mukdarda ýolagçy gatnatdylar. 2020-nji ýylda pandemiýa sebäpli gatnawlar 46%, 69,24 mln ýolagça çenli azaldy.
Russiýanyň awiakompaniýalaryna 2030-njy ýyla çenli 700 döwlet uçary we 430-dan gowrak dikuçar gerek bolar. Uçarlara zerurlyk gatnaw göwrüminiň ýokarlanmagyna garaşylmagy hem-de “ýakyn wagtda ulanylyş möhleti tamamlanjak 800-den gowrak daşary ýurt howa gämilerini çalyşmagyň zerurlygy” bilen baglanyşyklydyr diýlip, strategiýada bellenilýär.
Strategiýa taslamasyndan gelip çykyşy ýaly, “2035-nji ýyla çenli ykdysadyýetiň ösmegi, sebit aragatnaşygynyň ýokarlanmagy, syýahatçylyk zolaklarynyň ösmegi netijesinde ulaglaryň ähli görnüşleri bilen gatnawlaryň artmagynyň dowam etmegine garaşylýar”. Ulag ministrliginiň çaklamasy boýunça, bu wagta çenli demir ýol arkaly uzak aralyga ýolagçy gatnawlary 29%, 150 mln ýolagça, awtomobil gatnawlary 3%, 124 mln ýolagça çenli artar.
