Sony Pictures Animation studiýasy we Amazon kompaniýasy, takmynan, 100 million dollarlyk şertnamanyň şertlerini ara alyp maslahatlaşýarlar. Şertnamanyň çäklerinde «Nägehanlar dynç alyşda: Transformasiýa» multfilmi Amazon Prime Video striming hyzmatynyň sanawyna goşular. Bu barada www.kinoafisha.info habar berýär.
Variety-iň habaryna görä, filmiň 1-nji oktýabrda meýilleşdirilen kinoteatrlarda görkezilişiniň yza süýşmegi ähtimal. Koronawirusyň täze "Delta" ştammy bilen baglylykda ýagdaýlaryň agyrlaşmagy we 12 ýaşa çenli çagalar üçin sanjymyň ýoklugy sebäpli, Sony-niň ýolbaşçylary «Nägehanlar dynç alyşda 4» ýaly çagalara niýetlenen filmi çykarmagy täjirçilik taýdan bähbitsiz hasaplaýar. Myş-myşlara görä, kompaniýalar animasiýa lentasy üçin alternatiw paýlama ulgamy barada eýýäm awgust aýynyň başynda pikirlenip başlapdylar.
Şeýle hem, geleşigiň jikme-jikliklerinden habarly çeşmeler Sony Pictures Animation bilen Amazon-yň arasyndaky şertnamanyň multfilmi metbugatda, telewideniýede we Hytaýda ýaýratmak üçin ilkinji hukugynyň bardygyny öňe sürýärler. Ýöne iki kompaniýanyň wekilleri hem entek bu mesele boýunça resmi beýanat bermediler. Ýeri gelende bellesek, «Nägehanlar dynç alyşda» franşizasy 2012-nji ýylda adybir film bilen başlanypdy.
