Ýaponiýanyň paýtagtynyň çäginde Olimpiada obasy işläp başlady. Bu barada pandemiýa sebäpli obýektiň açylyş dabarasyny geçirmekden ýüz öwren Tokioda geçiriljek tomusky Olimpiýa oýunlarynyň guramaçylyk komiteti habar berdi. Muny TASS ýetirýär.
Tokio aýlagynyň kenarynda ýerleşýän obanyň meýdany, takmynan, 44 gektara barabar. Ol Oýunlar wagtynda, takmynan, 3,8 müň ýaşaýyş jaýyny eýelejek 18 müň türgeniň we olimpiýa toparlarynyň beýleki agzalarynyň ýerleşmegi üçin niýetlenendir. Türgenler ýaryşlary başlamazdan bäş gün öň oba gelerler we tamamlanandan soň iki günüň içinde obadan gitmeli bolarlar. Guramaçylar, eger-de pälwanlar we tennisçiler ýaly beýleki türgenleriň türgenleşigini geçirmek üçin gerek bolsalar, käbir türgenlere galmak möhletini uzaltmaga rugsat berip bilerler. Mundan başga-da, Oýunlaryň açylyş we ýapylyş dabaralarynda Olimpiada gatnaşyjy ähli ýurtlaryň wekilleriniň bolmagyny üpjün etmek üçin galmaga rugsat berler.
Koronawirusyň ýaýramagynyň öňüni almak üçin obada kesel alamaty bolan türgenleri barlamak üçin niýetlenen gije-gündiz işleýän aýratyn lukmançylyk bölümi bolar. Mundan başga-da, türgenler her gün kesel üçin barlag tabşyrmaly, gorag örtüklerini dakynmaly we sosial araçägi saklamaly bolarlar.
Ýatlap geçsek, guramaçylar Oýunlary daşary ýurtly janköýerler bolmazdan geçirmek kararyna geldiler, ýerli ýaşaýjylar hem alty prefekturada, şol sanda Tokioda geçiriljek olimpiýa ýaryşlaryna goýberilmez.
Şeýle hem okap bilersiňiz:
